Svíar í úrslitaleikinn - unnu Ungverja með einu marki

Svíar eru komnir í úrslitaleikinn í handboltakeppni karla á Ólympíuleikunum í London eftir 27-26 sigur á Ungverjum í undanúrslitunum í kvöld. Svíar mæta annaðhvort Frökkum eða Króötum í úrslitaleiknum á sunnudaginn.

Svíar voru með frumkvæðið nær allan leikinn og náðu nokkrum sinnum fjögurra marka forskoti en Ungverjar gáfust aldrei upp og voru inn í leiknum allt til loka.

Niclas Ekberg skoraði sex mörk fyrir Svía og þeir Kim Andersson og Jonas Källman voru báðir með fimm mörk. Gábor Császár skoraði átta mörk fyrir Ungverja.

Svíar sem töpuðu fyrir Íslandi í riðlakeppninni eru þar með komnir alla leið í leikinn um gullið en Ólympíugullið er eini stóri titilinn sem karlaliði Svía vantar í safnið.

Ungverjar voru undan að skora í upphafi leiks en Svíar skoruðu þrjú mörk í röð og komust þá í 5-3. Ungverjar svöruðu með þremur mörkum í röð og náðu aftur að komast yfir í 6-5.

Svíar voru hinsvegar sterkari í seinni hluta fyrri hálfleiks, náðu mest fjögurra marka forskoti og voru 15-12 yfir í hálfleik.

Svíar náðu aftur fjögurra marka forskoti í upphafi seinni hálfleiks, 20-16, en Ungverjar gáfust ekki upp og minnkuðu muninn aftur í eitt mark, 21-20.

Svíar voru áfram með frumkvæðið og Ungverjar náðu aldrei að jafna metin þótt þeim tækist nokkrum sínnum að minnka muninn í eitt mark á lokamínútunum leiksins.

Þjálfararnir hjá Svíum, Staffan Olsson og Ola Lindgren unnu þrjú silfur á Ólympíuleikunum frá 1992 til 2000 en eiga nú möguleika á að hjálpa sænska handboltalandsliðinu að vinna sitt fyrsta Ólympíugull.