Miklar hræringar innan stjórnmálaflokka í vetur

Það verður mikil barátta innan stjórnarflokka næsta vetur þegar raðað verður á framboðslista. „Það verða miklar hræringar. Það er alveg ljóst," segir Guðmundur Hálfdanarson, sagnfræðingur, í viðtali í útvarpsþættinum Á Sprengisandi í dag.

Nú eru allar líkur á að fylgi flokka muni breytast mikið frá síðustu kosningum. Sjálfstæðisflokkurinn mun t.d. stækka mikið. Þeir flokkar sem eiga erfiðustu baráttuna fyrir höndum, að mati Guðmundar, eru þeir flokkar sem munu tapa fylgi. „Þá þarf að ýta þingmönnum út af listum," segir hann.

Guðmundur og Stefanía Óskarsdóttir, stjórnmálafræðingur, ræddu landslagið í stjórnmálum á Bylgjunni í morgun. Stefanía telur að það geti verið óheppilegt að hafa gamla þingmenn sem voru virkir í samfélaginu fyrir hrun eða hafa tengingar inn í viðskiptalífið ofarlega á listum stjórnmálaflokkanna.