Rúnar: Fullkomið skref á þessum tímapunkti

Rúnari Kárasyni, sem á dögunum gekk til liðs við Grosswallstadt í efstu deild þýska handboltans, líst vel á að spila í bláu og hvítu á nýjan leik.

Rúnar segir fyrsta kost hafa verið að spila áfram með Bergischer HC og hafi lagt allt kapp á að halda liðinu uppi. Það tókst þó ekki. „Ég gat sagt upp samningnum ef við myndum falla sem var alltaf möguleiki sem ég ætlaði að nota," segir Rúnar og segir hjólin hafa farið að snúast hratt eftir að ljóst var að Bergischer félli.

„Það var fínt að klára þetta áður en ég kom heim. Ég var búinn að ákveða mig að ef þetta myndi ekki ganga upp myndi ég fara til „Grosso". Það er gott skref íþróttalega séð fyrir mig. Fornfrægur klúbbur sem hefur stöðugt verið að skila af sér ungum leikmönnum í betri lið," segir Rúnar en ekki spilli fyrir að hafa félaga sinn Sverre Jakobsson úr landsliðinu í herbúðum liðsins.

„Það er auðvitað gaman að vera með Sverre því ég þekki hann vel. Hann ber félaginu vel söguna," segir Rúnar.

Rúnar, sem er nýorðinn 24 ára, telur skrefið til Grosswallstadt passlegt fyrir sig á þessum tímapunkti á ferli hans.

„Hvorki of stórt né of lítið. Fullkomið í rauninni. Það er betra fyrir mig að fá að spila mikið með félagi í neðri hluta deildarinnar heldur en að fara ofar og vera mikið á bekknum," segir Rúnar sem reiknar með samkeppni um stöðu hægri skyttu.

„Þeir vilja ekki setja alla pressuna á 24 ára strák sem ég skil mjög vel. Það er líka gott fyrir mig. Ég hef fengið mjög lítið aðhald í vetur hvað varðar samkeppni og hef í rauninni bara verið tekinn útaf ef ég hef verið lélegur," segir Rúnar sem segir liðið byggja á varnarleik sínum.

„Þetta er mjög sterkt varnarlið og einnig stemmninglið ekki ósvipað gamla KA með Sverre í broddi fylkingar," segir Rúnar og bætir við að litirnir í búningi félagsins spilli ekki fyrir.

„Ég er líka ánægður að þeir spila í hvítu og bláu. Þá er maður kominn aftur í Fram-litina sem er klassi," segir Rúnar sem lék með Fram upp yngri flokka allt til ársins 2009 er hann hélt í atvinnumennsku.

Rúnar segist ekki vera kominn með fiðring vegna Ólympíuleikana í sumar.

„Fyrir það fyrsta veit ég ekki hvort ég fari með eða ekki. Það er bara að taka hvern dag með því hugarfari að hann sé síðasti dagur fyrir niðurskurð," segir Rúnar og bætir við að hann hafi aldrei verið í betra líkamlegu formi og langi til London.

„Það væri algjör draumur að fá að spila á Ólympíuleikum með þessum snillingum hérna."

Áður en að Ólympíuleikunum kemur mætir landsliðið Hollendingum í tveimur leikjum í undankeppni heimsmeistaramótsins sem fram fer á Spáni í janúar.

„Ef ég fæ tækifærið á móti Hollandi þarf ég klárlega að nýta það enda fer hver að verða síðastur að tryggja sæti sitt í hópnum."