Sendu Samkeppniseftirliti kvörtun

Wow air hefur kært til Samkeppniseftirlitsins synjun IGS, dótturfélags Icelandair, á því að veita Wow air þjónustu við flugafgreiðslu á Keflavíkurflugvelli. Vallarvinir, annað fyrirtæki sem annast flugafgreiðslu í Keflavík, hefur einnig hafnað því að þjónusta Wow air.

„Á Keflavíkurflugvelli ríkir fákeppni er varðar flugafgreiðslu. Vegna yfirburðastöðu IGS, dótturfélags Icelandair Group og systurfélags Icelandair, er mjög erfitt fyrir nýja aðila að komast inn á þennan markað," segir Baldur Oddur Baldursson, forstjóri Wow air. „Fákeppnin leiðir til hærri flugafgreiðslukostnaðar til ótengdra félaga og hækkar farmiðaverð til og frá Íslandi.“

Wow air hafði samið við Keflavík Flight Services um þjónustu í Keflavík. „Við vildum hins vegar vera með varaleið og óskuðum nýlega eftir tilboði frá IGS. IGS synjaði okkur um viðskipti. Við teljum að sú synjun byggi á ómálefnalegum forsendum, hún feli í sér misnotkun IGS á markaðsráðandi stöðu sem fari gegn ákvæðum samkeppislaga. Þessi háttsemi hefur verið borin undir Samkeppniseftirlitið og málið er í hefðbundnum farvegi hjá stjórnvaldinu," segir Baldur. - óká