Hefta vind og binda kolefni

Vísbendingar eru um að aukinn trjágróður og byggð innan borgarmarka Reykjavíkur hafi dregið úr vindi svo nemi allt að 0,1 metra á sekúndu á hverjum áratug frá því um 1950. Þetta kemur fram í grein sem Einar Sveinbjörnsson veðurfræðingur ritar í fyrsta tölublað Skógræktarritsins á árinu sem nú er komið út.

Í annarri grein fjalla svo skógfræðingarnir Arnór Snorrason og Gústaf Jarl Viðarsson um rannsóknir sínar á kolefnisbindingu trjágróðurs í þéttbýli Reykjavíkur. Niðurstöður þeirra sýna að kolefnisbinding trjáa á þessu svæði nemi um 5.000 til 7.600 tonnum af koltvísýringi á ári hverju. - óká