Feðgin hætt komin þegar gúmmíbát hvolfdi

Karlmaður og dóttir hans voru hætt komin þegar litlum gúmmíbáti þeirra hvolfdi við Borgareyjar skammt frá Borgarensi í gærkvöldi. Björgunarsveitir og þyrla Landhelgisgæslunnar voru kallaðar út.

Björgunarsveitarmenn fundu stúlkuna og bátinn fljótlega, en hún hafði komist upp í eina eynna. Straumur hafði hinsvegar borið manninn í burtu en áhöfn þyrlunnar fann hann í sjónum laust upp úr klukkan ellefu, hífði hann um borð og flutti á slysadeild Landsspítalans. Hann var orðinn kaldur og þrekaður.

Það varð þeim feðginum að öllum líkindum til lífs, að sögn björgunarmanna, að þau voru í flotgöllum.