Enn reynt að ljúka þingstörfum

Við upphaf þingfundar í morgun sagði forseti Alþingis líta svo á að dagurinn í dag sé aukadagur til þess að reyna að ljúka þingstörfum. Þó þurfi að meta dagskrána í framhaldinu. Enn er þó óljóst hvenær þinginu lýkur enda hefur engin sátt fengist í sjávarútvegsmálin.

Enn er óljóst hvenær þingi lýkur en Ásta Ragnheiður Jóhannesdóttir, forseti Alþingis, segir í samtali við Morgunblaðið í dag að löngu sé orðið tímabært að þingfundum ljúki. Henni hugnist ekki þing í júli enda sé lögbundið sumarleyfi þingsins frá fyrsta júlí til tíunda ágústs. Sömuleiðis megi minna á að innsetning forseta í embætti fari fram í Alþingishúsinu 1. ágúst og gera þurfi tímafrekar ráðstafanir og breytingar í húsinu fyrir þá athöfn.

Hægt er að ljúka þingi á einum degi en ágreiningurinn um sjávarútvegsmálið og þá sérstaklega veiðileyfagjaldið virðist standa því í vegi. Samkvæmt heimildum fréttastofu er miðað að því að formenn flokkana á Alþingi hittist í dag til þess að ræða málið og kanna hvort einhver grundvöllur sé fyrir því að ljúka þingi með einhverjum hætti.