Ferðamannadagurinn mikli - Öngþveiti á Þingvöllum

Öngþveiti var á helstu ferðamannastöðum þegar metfjöldi kom til landsins með skemmtiferðaskipum. Áætlað er að farþegarnir og áhafnir hafi eytt rúmum hundrað milljónum í vörur og þjónustu á þessum eina degi.

Það var mikið um að vera á Skarfabakkanum í dag en aldrei áður hafa jafnmargir komið með skemmtiferðaskipum til Reykjavíkur á einum degi eða 10 þúsund manns.

Alls komu fjögur skip. Það fyrsta kom sjö í morgun og síðan fylgdu hin á eftir. Talið er að um fimm þúsund manns hafi farið í skipulagðar ferðir í dag

„Þetta er svo vel undirbúið af þeim sem eru að sjá um að útvega rútur, leiðsögumenn og að skipleggja ferðirnar að það hefur bara allt gengið eins og smurð vél," segir Ágúst Ágústsson, markaðsstjóri Faxaflóarhafna.

Ágúst segir ferðir í Bláa lónið, upp á jökla og að náttúruperlum á Suðurlandi hafa verið vinsælar. Töluverður tekjur eru af komu skipanna.

„Ég hugsa að þessi dagur í dag svona bein eyðsla farþeganna og þeirra sem eru í áhöfn sé eitthvað í kringum 100 milljónir," segir Ágúst.

Við Almannagjá var þröngt á þingi snemma dags og tugir langferðabíla á svæðinu. Einhverjir kvörtuðu yfir því að þeir næðu ekki að njóta fegurðarinnar og friðsældarinnar sem þeim hafði verið sagt að ríkti á Íslandi vegna mannmergðar.

En mikill fjöldi mynda var tekin og því getur fólk notið þess sem á þeim má sjá í betra tómi síðar og líklega hafa langflestir náð að njóta þess sem fyrir augu bar.

Ferðamenn sem fréttastofa tók tali við Geysi kváðust flestir ánægðir og þeir sem höfðu komið áður sögðu að þeim þætti ferðamennskan hafa tekið jákvæðum breytingum undanfarin ár.