Mun ekki tjá sig um Monte Carlo

Stefán Eiríksson, Lögreglustjóri á höfuðborgarsvæðinu, mun ekki tjá sig um mál veitingastaðanna Mónako og Monte Carlo. Eigandi staðanna, Margeir Margeirsson, sagði í dag að hann hyggðist höfða mál gegn lögreglunni í Reykjavík sem og Reykjavíkurborg vegna þeirrar ákvörðunar að synja stöðunum um veitingaleyfi.

Ákvörðun um lokun veitingastaðanna var tekin á grundvelli neikvæðrar umsagnar borgarráðs - innanríkisráðuneyti hefur þegar úrskurðað að með umsögninni hafi ráðið farið út fyrir umsagnarsvið sitt og þannig brotið gegn stjórnsýslulögum.

Lögmaður Margeirs, Jónas Örn Jónasson, segir að umsögn borgarráðs sé byggð á kvörtunum sem hafi verið órökstuddar. Að hans mati er löggjöf um skemmtanahald fullnægjandi, það sé hins vegar framkvæmd lögreglunnar og Reykjavíkurborgar sem sé ábótavant.

Í samtali við Vísi sagði Stefán að hann myndi ekki tjá sig um gagnrýni Jónasar og að málið væri nú til skoðunar hjá lögreglunni.