Kristján þjálfari ársins í Svíþjóð

Einn efnilegasti þjálfari Íslands, Kristján Andrésson, hefur heldur betur verið að gera það gott sem þjálfari síðan hann neyddist til þess að leggja skóna á hilluna á besta aldri.

Kristján hefur verið valinn þjálfari ársins í sænska handboltanum en hann stýrir liði GUIF sem fór alla leið í úrslitaleikinn þar sem það reyndar steinlá fyrir Savehof.

Þetta er í annað sinn sem Kristján kemur liðinu í úrslit á þrem árum sem þjálfari liðsins.

Kristján er aðeins 31 árs að aldri. Hann lék 13 leiki með íslenska A-landsliðinu og var meðal annars í hópnum sem lék á ÓL í Aþenu árið 2004.