Steve Jobs látinn

Steve Jobs, stofnandi og fyrrum forstjóri Apple, lést í dag en þetta kom fram á heimasíðu Apple fyrir stundu. Hann var 56 ára að aldri en hann hefur barist við krabbamein í brisi í nokkurn tíma.

Á heimasíðu Apple má sjá minningargrein um Jobs þar sem sköpunargáfu hans og lífsgleði er lýst.

Hann sagði skilið við Apple fyrir nokkrum vikum vegna veikinda sinna.

Ferill Jobs er ævintýri líkastur en honum hefur tekist að byggja þetta fyrirtæki upp í að vera annað verðmætasta fyrirtækið á bandaríska hlutabréfamarkaðinum.

Ekki er vitað hver var faðir Steve annað en að sá var frá Egyptalandi. Móðir hans hét Joanne Simpson en fljótlega eftir fæðingu hans var hann ættleiddur af þeim Clöru og Paul Jobs sem bjuggu í Sílíkon dalnum í Kaliforníu.

Steve fékk snemma áhuga á tölvum og hann stofnaði Apple fyrirtækið í bílskúrnum heima hjá sér aðeins 21 ára gamall ásamt Steve Wozniak árið 1976. Fyrstu tölvur þeirra Apple I og Apple II komu svo á markað ári seinna.

Wozniak yfirgaf Apple árið 1981 og Steve árið 1985.

Það var svo árið 1996 að Steve tók aftur við forstjórastöðu Apple og hefur uppgangur fyrirtækisins verið með ólíkindum síðan. Steve stóð fyrir þróun og uppbyggingu á tækjum eins og iMac, iPod, iPhone og iPad sem skilað hafa fyrirtækinu methagnaði hvað eftir annað.