Vegna frétta RÚV um meint tryggingasvik út á látna konu

Í kvöldfréttum RÚV 30.01. og 31.01. síðastliðinn er amma mín nafngreind í tengslum við meint tryggingasvik út á nafn hennar látinnar. Ekki var látið þar við sitja heldur útlistað nánar um hvaða manneskju væri að ræða og ættingja hennar með því að bendla okkur við kvikmyndina Djöflaeyjuna eftir Friðrik Þór Friðriksson og þrjár skáldsögur Einars Kárasonar. Farið var í grófum dráttum yfir „viðburðaríka" ævi þessarar merku konu, á léttvægan hátt og að mörgu leyti farið rangt með staðreyndir. Það virðist ekki skipta þá hjá RÚV nokkru máli að með framsetningu fréttanna, á þennan máta, féll grunur á alla fjölskyldumeðlimi hinnar látnu. Af virðingu við ömmu mína sé ég mig knúna til að skrifa þetta og lýsa yfir undrun minni og hneykslan á þessum vinnubrögðum sem ég tel RÚV ekki til framdráttar.

Ég vil taka það fram að ég er ekki að amast við fréttunum sem slíkum, enda ekki hlynnt því að verið sé að svindla á skattborgurum þessa lands. Ég skil mætavel tilganginn í því að upplýsa skattgreiðendur um svikin og gæta hagsmuna þeirra. Gott og vel. Var virkilega nauðsynlegt að nafngreina látna konu, á þessu stigi málsins, og svívirða minningu hennar og mannorð ættingjanna? Dómstóll götunnar er harður og það er okkur saklausum fjölskyldumeðlimum þungbært að liggja undir grun án þess að hafa nokkuð um það að segja.

Ég hef farið fram á afsökunarbeiðni frá RÚV en tjáð að slíka fái ég ekki. Að ekki hafi verið nokkurrar vanvirðingar að gæta í fréttunum en harmað ef þetta hafi valdið sárindum. Ég hélt að varlega þyrfti að stíga til jarðar í nafnbirtingum og vanda fréttaflutning á látnum einstaklingum. Ef ég skil þau svör sem ég hef fengið rétt þá var það fréttnæmt og ekki farið rangt með þær staðreyndir að ættingi lægi undir grun jafnframt því sem amma væri þekkt fyrirmynd persónu úr bókmenntum okkar landsmanna. Var þá ekki réttara og fagmannlegra að nafngreina þann grunaða og stikla á lífshlaupi þess aðila?

Afsökunarbeiðnina fæ ég ekki. Því tel ég mikilvægt að opinbera þessar hugsanir mínar frammi fyrir alþjóð og halda þannig í heiðri minningu ömmu minnar heitinnar og mannorði okkar sem saklaus erum. Satt best að segja komu þessar fréttir okkur svo í opna skjöldu að ég hefði verið minna hissa ef fullmannað geimfar hefði lent í garðinum mínum. Dæmi nú hver fyrir sig um þennan fréttaflutning RÚV.

Að lokum óska ég þess að sá seki fái viðhlítandi refsingu og ríkið peningana til baka.

Megi amma hvíla í friði.

Lifið heil!