NBA í nótt: Boston og Lakers unnu góða sigra

Tveir leikir fóru fram í NBA-deildinni í körfubolta í nótt en þá unnu stórliðin Boston Celtics og LA Lakers sterka andstæðinga.

Boston vann San Antonio, 107-97. Síðarnefnda liðið er með besta sigurhlutfall allra liða í deildinni en tapaði engu að síður sínum fimmta leik í röð í nótt.

Boston átti heldur ekki frábæru gengi að fagna í marsmánuði en liðið missti til að mynda fyrsta sætið í Austurdeildinni í hendur Chicago.

Boston vann „aðeins" níu leiki af sextán í mánuðinum en liðið má helst ekki við því að tapa mörgum leikjum til viðbótar þar sem að Miami er skammt undan í þriðja sætinu.

Í nótt skoraði Rajon Rondo 22 stig auk þess sem hann gaf fjórtán stoðsendingar fyrir Boston. Jermaine O'Neal lék einnig með liðinu á nýjan leik eftir að hafa verið frá vegna hnémeiðsla. Paul Pierce var með 21 stig og ellefu fráköst og Kevin Garnett með 20 stig.

Tony Parker skoraði 23 stig fyrir San Antonio og Tim Duncan, sem hefur misst af síðustu fjórum leikjum, sneri aftur og var með 20 stig og þrettán fráköst. Manu Ginobili hefur einnig verið frá vegna meiðsla en hann hitti illa í nótt og var aðeins með níu stig.

San Antonio hefur átt frábært tímabil en á nú erfitt uppdráttar og það á versta mögulega tíma. Það er stutt í að úrslitakeppnin hefjist og með þessu áframhaldi eru góðar líkur á því að liðið muni missa toppsætið í Vesturdeildinni. LA Lakers og Dallas eru ekki langt undan.

Þessi tvö lið mættust einmitt í nótt og vann Lakers sautján stiga sigur, 109-82.

Kobe Bryant skoraði 28 stig fyrir Lakers og Andrew Bynum átti einnig góðan leik en hann var með átján stig og þrettán fráköst.

Alls fengu fimm leikmenn að fjúka út af í leiknum. Þeir Matt Barnes og Steve Blake úr Lakers og Jason Terry og Brendan Haywood úr Dallas fengu allir brottvísun fyrir stimpingar í fjórða leikhluta. Shannon Brown, Lakers, fékk svo sömu refsingu síðar í leiknum í ótengdu atviki.

Þetta var alls sextándi sigur Lakers í síðustu sautján leikjum liðsins og virðist liðið vera að toppa á hárréttum tíma. Liðið er nú með jafn gott sigurhlutfall og Chicago, topplið Austurdeildarinnar.

Hjá Dallas var Dirk Nowitzky stigahæstur með 27 stig auk þess sem hann tók þrettán fráköst.