Ólafur Stefánsson: Ólíklegt að ég verði með

„Það eru ansi litlar líkur á því að ég verði með. Þetta er eiginlega búið,“ segir Ólafur Stefánsson við Fréttablaðið spurður um líkurnar á því að hann spili með íslenska landsliðinu á EM í Serbíu í janúar. Ólafur er nýbyrjaður að spila eftir langvinn meiðsli.*

„Gummi þjálfari vill halda þessu eitthvað opnu en það er samt ólíklegt að ég verði með. Gummi vill líklega sjá hvernig ég verð næstu tvær vikur. Þetta kemur í ljós en líkurnar eru litlar.“

Landsliðsfyrirliðinn segir ekki koma til greina að fara með hópnum til Serbíu verði hann ekki í standi til þess að spila með liðinu.

„Ég ætla ekki að vera neinn túristi þarna. Ég vil frekar vera hér í Danmörku og byggja upp hnéð meðan á mótinu stendur. Ég held það sé skynsamlegra því þá eru meiri líkur á að ég geti spilað í undankeppni Ólympíuleikanna og nýst mínu liði betur á árinu.

Ég verð að sýna félaginu smá virðingu líka. Það er því ekkert skynsamlegt að fara á þetta mót eða verða aðstoðarþjálfari, þriðji valmöguleiki eða álíka. Ef ég fer þá yrði það til þess að spila,“ segir Ólafur en er Guðmundur landsliðsþjálfari að leggja hart að honum að vera með?

„Nei, hann skilur þetta fullkomlega og þetta er ekkert vandamál. Við erum ekki búnir að ræða þetta til enda samt.“

Ólafur er duglegur að mæta í lyftingasalinn og á réttri leið þó svo að hann vilji ekki tjá sig mikið um meiðslin.

„Ástandið er bara eins og það er. Meira vil ég í raun ekkert segja um það. Nú verð ég bara að sýna hvernig ég er,“ segir Ólafur en hann segist vera að æfa vel. „Annars vil ég bara sem fæst orð hafa um meiðslin. Ég er löngu hættur að meta mig og sáttur við hverja æfingu og hvern leik. Ég vil spila og láta verkin tala,“ segir Ólafur og bætti við.

„Maður er ekkert í neinum yfirlýsingum eftir að hafa verið meiddur. Þá vill maður vinna í sínu, segja minna og sýna meira. Það er hverjum manni hollt eftir svona pakka. Ég er búinn að læra margt af þessu mótlæti og Danirnir verið góðir við mig. Vonandi heldur ástandið að batna og næsta ár verði mjög gott.“