Landsvirkjun ekki gerð að hlutafélagi

Ekki verður hróflað við opinberu eignarhaldi á stóru orkufyrirtækjunum hjá núverandi ríkisstjórn, að sögn Steingríms J. Sigfússonar fjármálaráðherra. Í skýrslu sem Ásgeir Jónsson og Sigurður Jóhannesson unnu fyrir fjármálaráðuneytið er lagt til að breyta orkufyrirtækjum í hlutafélög og auka verkefnafjármögnun við nýjar framkvæmdir.

Steingrímur segist ekki sjá að neitt verði unnið með því að breyta Landsvirkjun í hlutafélag; starfsemi fyrirtækisins byggi á sérlögum. Eins sé vandséð hverju hlutafélagaform breyti varðandi rekstur Orkubús Vestfjarða og RARIK. „Varðandi eignarhaldið sjálft stendur ekki til að hrófla við því, það liggur fyrir. Árið 2010 gaf ríkisstjórnin út yfirlýsingu þess efnis."

Katrín Júlíusdóttir iðnaðarráðherra segist vera afhuga því að breyta Landsvirkjun í hlutafélag. „Ég hef ekki hallast að því að við ættum að gera það, vegna þess að við ætlum okkur að styrkja og styðja við Landsvirkjun þannig að hún geti skilað alvöru arðsemi til þjóðarinnar. Fyrirtækið er þess eðlis að við eigum mikla hagsmuni undir því að við eigum það áfram og teflum því ekki í tvísýnu."

Katrín segist hins vegar fylgjandi aukinni verkefnafjármögnun, en þá koma fjárfestar að og leggja fé í einstaka verkefni. Uppbygging í orkuiðnaði hafi byggt á erlendum lántökum og töluverður hluti af arðsemi verkefna hafi farið í að greiða þau lán upp.

Iðnaðarráðherra segir að verkefnafjármögnun gefi færi á því að fá fjármagn inn í landið til skemmri tíma. Þá geti innlendir aðilar, svo sem lífeyrissjóðir, tekið þátt í slíkum verkefnum. „Mér finnst það spennandi kostur og sjálfsagt að ræða það."

Ráðherrarnir eru sammála um að skýrslan sýni að arðsemi fyrirtækisins hafi verið ónóg. Steingrímur segir skýrsluna styrkja þá mynd sem Landsvirkjun hafi dregið upp á fundum. Huga verði betur að arðsemisþættinum og leita leiða, í gegnum hærra orkuverð og betri samninga, til að ná auðlindarentu og arðinum til eiganda fyrirtækisins – þjóðarinnar.

kolbeinn@frettabladid.is