Starfsmenn eiga ekki möguleika á að hlera

„Aðalatriðið í málinu er að það er enginn möguleiki fyrir starfsmenn Símans að hlera. Það er bara ekki hægt,“ segir Sævar Freyr Þráinsson, forstjóri Símans, spurður um viðbrögð fyrirtækisins við kvörtun þess efnis að tiltekinn starfsmaður þess hafi hlerað síma fyrrverandi maka síns í heimildarleysi.

Póst- og fjarskiptastofnun hefur nú með höndum rannsókn á slíku máli og hvort viðbrögð Símans hafi verið fullnægjandi, eins og Fréttablaðið greindi frá í gær.

Sævar Freyr segir erfitt að ræða þetta einstaka mál. Þó segir hann aðspurður að í ljósi þess að ekki sé til hlerunarbúnaður hjá Símanum og því ógerlegt fyrir starfsfólk að hlera símtöl hafi málið ekki verið kært til lögreglu né viðkomandi starfsmaður látinn hætta.

„Hlerunarbúnaðurinn er hjá lögreglu og þegar hleranir fara fram þarf aðstoð starfsmanna Símans til að tengja lögreglu við númerið sem þarf að hlera. Það er það eina sem starfsmenn geta gert hér,“ segir Sævar.

„Ég tek undir það sem Ásgeir Karlsson, yfirmaður greiningardeildar ríkislögreglustjóra, og Ögmundur Jónasson innanríkisráðherra sögðu í Fréttablaðinu í gær að auka þarf eftirlit með hlerunum og tengiliðum lögreglu innan fjarskiptafyrirtækjanna. Slíkt myndi auðvelda fyrirtækjunum aðkomu að þessum viðkvæmu málum, sem mikilvægt er að unnin séu af öryggi af þeim starfsmönnum sem sinna þessu verkefni.“- jss