ÍR vann bikarinn í 20. sinn

ÍR-ingar urðu á laugardag bikarmeistarar í frjálsum íþróttum þriðja árið í röð en keppt var á Kópavogsvelli. ÍR-ingar höfðu betur í samanlagðri stigakeppni eftir baráttu við FH-inga. ÍR hlaut 170 stig en FH 153 stig.

„Þetta var æði. Hópurinn er rosalega góður þótt liðið sé mjög ungt. Ég var aldursforseti í kvennaflokknum, 22 ára,“ sagði Sandra Pétursdóttir fyrirliði ÍR. Hún sagði góða liðsheild lykilinn að sigrinum sem var sá tuttugasti í sögu félagsins.

„Það voru allir vel samstilltir og ætluðu að vinna. Við töpuðum í samanlögðu á Meistaramótinu á Selfossi um daginn og það kom ekki til greina að tapa aftur. Það voru allir mjög hungraðir í þennan sigur.“

Kvennalið ÍR varð í efsta sæti en karlaliðið í öðru sæti á eftir FH. „FH er með mjög sterkt karlalið þannig að það hefur verið erfitt fyrir strákana að sigra þá. En það á eftir að koma einn daginn,“ sagði Sandra sem hafði sigur í sleggjukasti fyrir hönd ÍR-liðsins.

Óðinn Björn Þorsteinsson, fyrirliði FH, sigraði í kúluvarpi og sleggjukasti á mótinu.

„Þetta var svipað og búist var við. Að við myndum vinna karlabikarinn og stelpurnar myndu bæta aðeins við sig frá því í fyrra,“ sagði Óðinn Björn.

Hann sagði bæði FH og ÍR skipuð ungu fólki og að barátta yrði milli félaganna um bikarinn næstu ár.

„Við vorum búin að vinna bikarinn 15 ár í röð. ÍR er að vinna í þriðja skiptið í röð. Það fer að styttast í að við tökum þá aftur,“ sagði Óðinn Björn.

Þrjú met voru sett á mótinu og voru það ÍR-ingar sem settu þau öll. Hilmar Örn Jónsson setti piltamet í sleggjukasti og kvennasveitin stúlknamet í 1000 metra boðhlaupi. Þá setti karlasveitin einnig met í 1000 metra boðhlaupi í flokki 22 ára og yngri.