Þýddi 25 milljarða tekjulækkun

Ríkið myndi verða af um 25 milljarða króna tekjum að lágmarki yrðu skattleysismörkin hækkuð úr 118 þúsundum króna á mánuði í 150 þúsund. Þetta kemur fram í svari fjármálaráðherra við fyrirspurn Ólínu Þorvarðardóttur, þingmanns Samfylkingarinnar.

Samdráttur í tekjum ríkisins yrði enn meiri yrðu skattleysismörkin hækkuð í 200 þúsund krónur, eða á sjöunda tug milljarða, samkvæmt áætlun fjármálaráðuneytisins.

Í fyrirspurn Ólínu er einnig óskað eftir mati á því hversu miklar tekjur ríkissjóður hefði af því að bæta við skattþrepum.

Í svari ráðherrans kemur fram að tekjur ríkisins myndu aukast um 1,2 milljarða króna yrði 55 prósenta skattur lagður á mánaðartekjur yfir 1,2 milljónum króna og 65 prósent á tekjur yfir tveimur milljónum.

Þar segir enn fremur að tekjur ríkisins gætu aukist um 650 milljónir króna yrði 55 prósenta skattur lagður á tekjur yfir tveimur milljónum króna og 70 prósenta skattur á tekjur yfir þremur milljónum króna.

Í svarinu kemur fram að á síðasta ári hafi 654 einstaklingar verið með mánaðartekjur yfir 1,2 milljónum króna á mánuði. Þar af höfðu 126 tekjur yfir tveimur milljónum króna. - bj