Um hvað voru gömlu herbergisfélagarnir að rífast?

Það vakti talsverða athygli að vinirnir og gömlu herbergisfélagarnir, Alfreð Gíslason og Guðmundur Guðmundsson, skildu rífast nokkuð hraustlega eftir leik Kiel og Rhein-Neckar Löwen.

Í myndslaginu hér að ofan má sjá að Alfreð ætlar að þakka Guðmundi fyrir leikinn en hættir við á miðri leið. Í kjölfarið fórnar Guðmundur höndum og virkar ósáttur.

Þeir taka síðan nokkuð hraustlega rimmu. Í lok myndskeiðsins má síðan sjá Oliver Röggisch halda aftur af Guðmundi er hann ætlar að labba aftur til Alfreðs.

Á sama tíma sér Róbert Gunnarsson um að stjaka Alfreð í hina áttina.

Þeir félagar voru lengi herbergisfélagar er þeir léku með landsliðinu. Guðmundur var síðan aðstoðarlandsliðsþjálfari er Alfreð stýrði landsliðinu. Báðir eru þeir þó miklir keppnismenn eins og sjá má í innslaginu.

Lið Alfreðs, Kiel, vann annars leikinn og er ósigrað á toppi þýsku úrvalsdeildarinnar.