Dagur greindi Guðmundi frá óánægju sinni

Dagur Sigurðsson segist hafa greint Guðmundi Guðmundssyni landsliðsþjálfara frá því að hann væri ekki sáttur við hvaða meðferð Alexander Petersson væri að fá hjá íslenska landsliðinu.

Dagur var í viðtali í þýskum fjölmiðlum í dag þar sem hann gagnrýndi Guðmund opinberlega. Vísir greindi frá því í morgun.

Hann útskýrði mál sitt í viðtali við Hans Steinar Bjarnason í hádegisfréttum Bylgjunnar en viðtalið má heyra með því að smella á hlekkinn hér fyrir ofan.

„Guðmundur gaf Ólafi frí í desember þegar við [hjá Füchse Berlin] vorum einnig í miklu álagi [í þýsku úrvalsdeildinni," sagði Dagur en hann er þjálfari Füchse Berlin.

Alexander Petersson leikur með Füchse en Guðmundur er þjálfari Rhein-Neckar Löwen, félaginu sem Ólafur Stefánsson leikur með.

„Ólafur var samt heill þá. Hann lét svo Alexander spila tvo leiki og hann kom dauðþreyttur til baka til mín. Ég lét það vera að vera með læti þá en fór til Guðmundar í Svíþjóð og ræddi við hann. Ég sagði honum að ég væri ekki ánægður með þetta."

Lestu hér - Ólafur: Ég er ekki meiddur

„Núna finnst mér það sama vera upp á teningnum. Ólafur sagði í íslenskum fjölmiðlum að hann hefði verið tilbúinn að spila ef leikurinn hefði skipt einhverju máli," sagði Dagur og vísaði væntanlega til þess að Ólafur var hvíldur í öllum leiknum gegn Frakklandi í fyrrakvöld. Alexander spilaði í tæpar 48 mínútur í þeim leik.

Alexander sagði við Vísi á sínum tíma að hann væri að spila þjáður. "Mér er illt í hnénu en um leið og leikurinn byrjar þá er það gleymt. Ég slekk á öllum slíkum hugsunum. Eftir leik er það aftur vont en svona er þetta bara," sagði hann og bætti við að hann ætlaði sér að klára mótð.

Lestu hér - Alexander er að spila þjáður

„Ég skil ekki af hverju hann [Ólafur] er látinn sitja á bekknum allan leikinn. Alex er líka búinn að gefa út yfirlýsingar um að hann sé að spila þjáður og þurfi jafnvel að fara í aðgerð. Mér finnst að það komi ekki jafnt niður á þeim."

Dagur segir að Guðmundur sé í erfiðri stöðu sem bæði landsliðsþjálfari og þjálfari Rhein-Neckar Löwen.

„Þetta er ekki auðvelt staða sem hann er í. Það er gríðarleg pressa á honum í Löwen. En kannski er hann að gefa Ólafi pásu fyrir leikinn gegn Króatíu og ætli að fá hann sterkan inn þar. Ég geng í raun út frá því. Annars þætti mér þetta mjög skrýtið mál."

„Ég held að við sjáum það í leiknum á móti Króatíu hvort að hann var að hvíla Ólaf fyrir þann leik eða bara fyrir Rhein-Neckar Löwen. Það kemur í ljós."

Á meðan HM í Svíþjóð stóð var það tilkynnt að Alexander Petersson hefði samið við Rhein-Neckar Löwen og muni ganga til liðs við félagið árið 2012, þegar samningur hans við Füchse Berlin rennur út.

„Ég er bara að hugsa um minn leikmann - hann er enn minn leikmaður - og er að benda á að hann hafi verið að fórna sér fyrir [íslenska] liðið þrátt fyrir meiðsli. Menn hafi gengið á lagið og ekki hlíft honum eins og öðrum leikmönnum."