Úrslitin á HM í dag - Ísland og Danmörk í sérflokki

Ísland og Danmörk eru einu liðin sem unnu alla fimm leiki sína í riðlakeppninni á HM í handbolta í Svíþjóð en henni lauk í kvöld.

Ísland vann glæsilegan sjö marka sigur á Noregi, 27-22, og hlaut því fullt hús stiga í B-riðli eftir fimm sigra í fimm leikjum.

Hinir leikir dagsins í riðlinum skiptu litlu sem engu máli - allavega ekki upp á framhaldið í milliriðlakeppninni að gera.

A-riðill



Egyptaland - Barein 26-27

Þýskaland - Túnis 36-26

Frakkland - Spánn 28-28

Frakkland og Spánn voru með fullt hús stiga fyrir leik liðanna í kvöld. Flestir bjuggust við sigri Frakka í leiknum og fór það svo að þeir frönsku voru með yfirhöndina lengst af.

En með ótrúlegum lokaspretti náðu Spánverjar jafntefli og hleyptu þar með í raun toppbaráttunni í milliriðli 1 í mikið uppnám. Ísland er nú eitt með fjögur stig á toppi riðilsins.

Þýskaland varð í þriðja sæti riðilsins eftir sigur á Túnis í kvöld og verður fyrsti andstæðingur Íslands í milliriðlakeppninni.

B-riðill



Brasilía - Japan 32-33

Ísland - Noregur 29-22

Austurríki - Ungverjaland 30-32

C-riðill

Alsír - Ástralía 27-18

Króatía - Danmörk 29-34

Serbía - Rúmenía 28-38

Danir sýndu í kvöld að þeir eru með allra sterkasta liðið á HM með sannfærandi fimm marka sigri á Króötum eftir að hafa verið marki undir í hálfleik. Danmörk er eina liðið, ásamt Íslandi, sem vann alla fimm leiki sína í riðlakeppninni.

Danir höfðu þar að auki unnið alla hina fjóra leikina með góðum mun. Þeir mæta Pólverjum í fyrsta leik milliriðlakeppninnar og verður áhugavert að fylgjast þeim þeim slag.

Serbar fylgja Dönum og Króötum áfram í milliriðlakeppnina og var leikur þeirra gegn Rúmeníu í kvöld þýðingarlaus.

Serbía og Króatía skildu jöfn á þriðjudagskvöldið og fara því hvort með eitt stig í milliriðlakeppnina.

D-riðill

Suður-Kórea - Slóvakía 31-26

Argentína - Síle 35-25

Pólland - Svíþjóð 21-24

Svíar björguðu andlitinu í kvöld með góðum þriggja marka sigri á Póllandi sem voru taplausir fyrir kvöldið. Gestgjafarnir töpuðu óvænt fyrir Argentínu á þriðjudaginn.

Argentína vann Síle örugglega og fer í milliriðilinn með tvö stig, alveg eins og Svíþjóð og Pólland.

Úrslit og lokastaðan í riðlakeppninni