Willum: Fyrri hálfleikur það besta hjá okkur í sumar

Willum Þór Þórsson var mjög sáttur að loknum sigurleiknum gegn Víkingi í kvöld enda lið hans að sýna einn sinn besta leik í sumar á iðagrænum Nettóvellinum í Keflavík.

„Þetta var heilsteyptur og góður leikur hjá okkur. Fyrri hálfleikurinn var kannski það besta sem við höfum sýnt í sumar og svo komum við mjög kraftmiklir inn í seinni hálfleikinn en það kom aðeins hrollur í okkur þegar þeir minnka muninn og við féllum til baka og fórum að verja forskotið. Þá var maður ekki rólegur því Víkingsliðið hefur sýnt það í sumar að það er hörku fótboltalið en svo fengum við færi til að klára leikinn en markvörður þeirra var vel á verði. Ég er ofsalega ánægður leikinn í kvöld,“ sagði Willum.

Fyrir leikinn í kvöld munaði aðeins fjórum stigum á Víkingi og Keflavík og því ljóst að heimamenn hefðu sogast af krafti niður í fallbaráttuna með ósigri í kvöld. „Við fórum yfir þessi mál og ákváðum að við værum að fara í mikla fallbaráttuslagi á móti Fram og Víkingi þar sem þurfti sterkt hugarfar og stórt Keflavíkurhjarta og það tókum við með okkur í þessa leiki. Það er fyrst og fremst hugarfarið, baráttan og samstaðan í liðinu sem hefur siglt þessu heim,“ sagði Willum sem hefur verið hvergi banginn við að gefa ungum leikmönnum tækifæri í sumar þrátt fyrir brösótt gengi og hafa ungu leikmennirnir þakkað traustið.

„Þeir eru stór hluti af hópnum. Góð lið þróast og mótast og þeir mæta á hverja æfingu til að berja sig inn í liðið. Þeir unnu mjög vel í vetur, mættu vel á aukaæfingar og borðuðu hafragraut og tóku lýsi og æfðu sendingar og móttöku og það er engin tilviljun að þeir séu að láta að sér kveða.“

Verkefni Willum á næstunni er að kalla fram viðlíka leik hjá sínu liði og í fyrri hálfleik í kvöld. „Nú eru vellirnir orðnir þannig að hægt er að láta boltann fljóta og menn eru komnir í almennilegt leikform. Við höfum farið í gegnum rosalega leikjatörn. Við fengum aðeins hvíld inn á milli en vissum að við gætum komið ferskir til leiks og sóknarfærslurnar virkuðu í fyrsta sinn í sumar í dag,“ sagði Willum að lokum.