Umfjöllun: Keflavík losaði sig úr fallbaráttunni

Keflavík vann mikilvægan 2-1 sigur á Víkingi á heimavelli sínu í kvöld. Fyrir leikinn munaði aðeins fjórum stigum á liðunum og því ljóst að með sigri hefðu Víkingar sótt Keflavík í fallbaráttuna en með sigrinum er Keflavík nú sjö stigum frá fallsæti þar sem Víkingar sitja að því er virðist sem fastast.

Keflavík var mun betri aðilinn framan af leiknum og komst verðskuldað í 2-0 með mörkum Guðjóns Árna og Jóhanns Birnis og hefðu hæglega getað verið fleiri mörkum yfir í hálfleik. Í upphafi seinni hálfleiks benti ekkert til annars en að það sama yrði uppi á tenginum í seinni hálfleik en upp úr engu minnkuðu Víkingar muninn þegar táningurinn Viktor Jónsson fékk að skalla dauðafrír á markteig í netið eftir góða fyrirgjöf Kjartans Dige.

Eftir markið hörfuðu Keflvíkingar aftar á völlinn og Víkingar freistuðu þess að jafna metin. Víkingum tókst ekki að skapa sér teljandi færi en litlu mátti muna í þrígang að liðið næði að skapa sér dauðafæri en Ómar Jóhannsson var öflugur í marki heimamanna og varnarlínan að mestu vel vakandi.

Keflvíkingar freistuðu þess að sækja hratt og nýta sér það að Víkingar lögðu ofur áherslu á að sóknarleikinn og hefðu hæglega getað gulltryggt sigurinn rétt fyrir leikslok þegar Hilmar Geir komst einn gegn Magnúsi en Hilmar átti ekki sinn besta dag og Magnús varði vel.

Eins og áður segir var sigurinn mjög mikilvægur fyrir Keflavík en staða Víkings heldur áfram að versna og er liðið nú í fallsæti þar sem Grindavík náði stigi í kvöld. Það býr mikið í Víkingsliðinu og ljóst að liðið getur bjargað sæti sínu í deildinni ef leikmenn liðsins finna trúna sem virðist skorta og leiki í 90 mínútur eins liðið lék síðasta hálftímann í kvöld.



Keflavík-Víkingur 2-1

1-0 Guðjón Árni Antoníusson ´21

2-0 Jóhann Birnir Guðmunsson ´33

2-1 Viktor Jónsson ´68

Nettóvöllur. Áhorfendur: 793

Dómari:  Erlendur Eiríksson 7

Skot (á mark): 10-6 (6-4)

Varið: Ómar 3 – Magnús 4

Hornspyrnur: 3-6

Aukaspyrnur fengnar: 15-14

Rangstöður: 2-1