Heimir: Þýðir ekki að dveljast í fortíðinni

„Við kláruðum mótið með sæmd, við tökum þetta annað sæti úr því sem komið var eftir fyrri umferðina," sagði Heimir Guðjónsson, þjálfari FH eftir 5-3 sigur á Fylkismönnum í Árbænum í dag.

„Við klúðruðum málunum í fyrri umferðinni en við þurfum bara að skoða okkar mál og vinna úr því, það þýðir ekkert að dveljast á fortíðinni. Ég vona að þetta geri menn bara enn þyrstari í árangur næsta sumar og menn komi vel inn í næsta tímabil."

„Þetta var síðasti leikur Tommy Nielsen og menn vildu klára þetta á góðu nótunum, leyfa honum að hætta með sigri. Það verður erfitt að fylla skarð hans, hann er að mínu mati einn besti varnarmaður sem hefur spilað hér á landi og er með þann fágæta hæfileika að gera leikmenn í kringum sig betri. Nú tekur bara við leitin við að fylla skarð hans," sagði Heimir.