Níumenningarnir - aðalmeðferð hafin

Aðalmeðferð í máli ríkissaksóknara gegn níumenningunum svokölluðu sem ákærð eru fyrir árás á Alþingi hefst í Héraðsdómi Reykjavíkur klukkan 9.15. Gert er ráð fyrir að aðalmeðferðin muni standa yfir í þrjá daga.

Fjöldi fólks mætti í héraðsdóm til að sýna níumenningunum stuðning en málatilbúnaður gegn þeim hefur vakið reiði margra sem einnig tóku þátt í sömu mótmælum.

Í ákæru Láru V. Júlíusdóttur, setts ríkissaksóknara í málinu, eru níumenningarnir sagðir hafa í heimildarleysi ruðst inn í Alþingishúsið 8. desember 2008. Þeir eru ákærðir fyrir brot gegn Alþingi, brot gegn valdstjórninni, brot gegn almannafriði og allsherjarreglu og húsbrot. Níumenningarnir eru ákærðir á grundvelli 100. greinar hegningarlaganna en það var síðast gert eftir mótmælin á Austurvelli þegar Ísland gekk í Atlantshafsbandalagið í mars 1949.

Fréttamaður Vísis er á staðnum og flytur fregnir af gangi mála í dag.