Kiel kaupir mann frá AG Köbenhavn

Alfreð Gíslason, þjálfari þýska félagsins Kiel, er búinn að tryggja sér þjónustu Danans sterka Rene Toft Hansen sem leikur með danska ofurliðinu AG Köbenhavn.

Hansen gengur í raðir þýska liðsins sumarið 2012 en það er ekki óvenjulegt í handboltaheiminum að leikmenn semji við félög mörgum mánuðum áður en þeir fara til félagsins.

Hansen er öflugur línu- og varnarmaður sem leikið hefur um 20 landsleiki fyrir danska landsliðið.

Hann lék með Kolding áður en hann gekk í raðir AGK.