Níumenningarnir: Lögga kölluð fífl í réttarsal

Gert var hróp að lögreglumanni sem bar vitni fyrir héraðsdómi Reykjavíkur í dag. "Þið munið aldrei neitt. Andskotans fífl," kallaði einn af áhorfendum í salnum en vitnisburður lögreglunnar hefur síst varpað skýrara ljósi á hvað átti sér stað þegar hin meinta árás á Alþingi var gerð.

Fram hefur komið að svokallað "árásarboð" var sent lögreglunni og allt tiltækt lið sent að Alþingishúsinu. Ekki hefur komið fram hverjir hafa rétt á að senda slíkt boð eða hvaða reglur gilda um það.

Þeir lögreglumenn sem komu að vettvangi lýsa ólátum og slagsmálum inn í Alþingishúsinu. Lögreglumaðurinn Ellert Björn Svavarsson sagði: "Það var komið óæskilegt fólk inn á þingpallana." Flestar handtökur áttu sér hins vegar stað fyrir utan og þá fyrir þá sök að fólk fylgdi ekki fyrirmælum lögreglu um að halda sér utan lögregluborða.

Lögreglumaðurinn Guðmundur Ingi Rúnarsson átti þátt í að handtaka Andra Lemarqui og leiða hann frá þingpöllunum út úr húsinu. Vitnisburður Guðmundar var í veigamiklum atriðum ólíkur Andra en sá síðarnefndi hefur sakað lögregluna um harðræði. Þegar Guðmundur var spurður út í hvort hann hefði borið hann með andlitið á undan niður stiga sagðist hann ekki reka til þess minni.

"Þið munið aldrei neitt. Andskotans fífl!" heyrðist þá kallað úr salnum.

Verjandinn Ragnar Aðalsteinsson hefur þráspurt lögregluna út í ástandið sem síðar myndaðist á Austurvelli og af hverju fólk hafi ekki verið handtekið þá fyrir árás á Alþingi. Af hverju aðeins níu hafi verið handteknir en ekki 30? Og af hverju mótmælin síðar hafi ekki talist árás á þingið.

Hafa spurningar hans vakið upp pirring hjá dómara málsins Pétri Guðgeirssyni sem hefur beðið Ragnar að halda aftur að sér.

Það vakti hins vegar athygli þegar lögreglumaðurinn Guðmundur Ingi svaraði spurningu Ragnars á þann veg að ástandið þann 8. desember þegar níumenningarnar voru handteknir hafi ekki verið "friðsamlegt."

"Hvernig var ástandið þá síðar á Austurvelli?" spurði þá Ragnar.

"Það var verra," svaraði lögreglumaðurinn.