Yfirlýsing frá Breiðablik vegna félagaskipta Elfars Freys

Knattspyrnudeild Breiðabliks hefur sent frá sér yfirlýsingu vegna félagaskipta Elfars Freys Helgasonar til AEK Aþenu. Blikar voru ósáttir við framgöngu gríska félagsins en Elfar Freyr spilaði ekki með liðinu gegn Rosenborg í Þrándheimi líkt og þeir höfðu reiknað með.

Yfirlýsingin í heild sinni:

Yfirlýsing knattspyrnudeildar Breiðabliks vegna félagaskipta Elfars Freys Helgasonar til AEK Aþenu

Knattspyrnudeild Breiðabliks fagnar félagaskiptum Elfars Freys Helgasonar til AEK Aþenu. Enn á ný fær ungur og efnilegur leikmaður, sem uppalinn er í Breiðabliki, tækifæri á að fara út í atvinnumennsku og láta drauma sína rætast. Það er til marks um markvisst og gott uppeldisstarf knattspyrnudeildar Breiðabliks enda hefur að jafnaði einn leikmaður Breiðabliks haldið utan í atvinnumennsku á ári síðastliðin sex ár.  

Betur hefði mátt fara í fáeinum atriðum varðandi félagaskipti Elfars og telur knattspyrnudeild Breiðabliks að brotið hafi verið á rétti hennar hvað varðar eðlilegt ferli og samskipti um félagaskipti leikmanna. Það verður þó ekki látið skyggja á þennan gleðilega atburð og óskar knattspyrnudeild Breiðabliks Elfari velgengni á nýjum vettvangi.

Stjórn knattspyrnudeildar Breiðabliks