Guif einum sigri frá úrslitaleiknum

Sænska úrvalsdeildarfélagið Guif frá Eskilstuna er aðeins einum sigri frá úrslitaleiknum um sænska meistaratitilnn eftir sigur á Alingsås í dag, 29-24. Kristján Andrésson er þjálfari liðsins og bróðir hans, Haukur, leikur með því.

Guif tók þar með 2-1 forystu í rimmu liðanna í undanúrslitunum en úrslitaleikurinn fer fram í Skandinavium-höllinni í Gautaborg þann 7. maí.

Liðin mætast næst á fimmtudaginn í Alingsås og getur Guif með sigri þar tryggt sér sæti í úrslitaleiknum þar sem andstæðingurinn verður Sävehof.

Sävehof sópaði Gunnari Steini Jónssyni og félögum hans í Drott úr undanúrslitunum, 3-0.