Stærsti gullforðinn er í Sviss - miðað við mannfjölda

Gullverð er í hæstu hæðum þessa dagana og kemur það sér vel fyrir þau lönd sem hafa verið dugleg við að safna í forðann. Tímaritið The Economist hefur tekið saman töflu yfir þau lönd sem eiga mest af gulli miðað við hvert mannsbarn. Sviss trónir á toppi listans en forðinn þar nemur rúmum sex þúsund dollurum á hvert mannsbarn, eða um 670 þúsund krónum. Það nemur um fjórum únsum á hvert mannsbarn. Heildar gullforði Svisslendinga nemur rúmum þúsund tonnum. Líbanon fylgir í kjölfarið þegar hlutfallslegur forði er mældur og Þjóðverjar eru í þriðja sæti.

Líbanir komu sér upp miklum gullforða á sjöunda og áttunda áratugi síðustu aldar þegar landið var fjármálamiðstöð Miðausturlandsa. Í borgarastríðinu sem síðar geisaði í landinu tókst deiluaðilum ekki að snerta við forðanum og er sagt að þáverandi seðlabankastjóri landsins hafi sofið í gullgeymslunni til þess að koma í veg fyrir að misvitrir stjórnmálamenn kæmust með puttana í gullið.

Bandaríkjamenn sitja hinsvegar á mestu gullbirgðum heimsins ef ekki er litið til mannfjölda, en í forðabúri þeirra eu rúm átta þúsund tonn af gulli. Kínverjar koma ekki fyrir á listanum enda hafa þeir verið meira í því að safna ríkisskuldabréfum frekar en að bæta við gullforðann. Sérfræðingar velta því hins vegar fyrir sér hvað myndi gerast ef Kínverjar ákveða að snúa sér í meiri mæli að gullsöfnun.