Allir írsku bankarnir gætu endað í ríkiseigu

Írsk stjórnvöld gætu neyðst til þess að taka yfir ráðandi hlut í Bank of Ireland og Irsh Life & Permanent í kjölfar birtingar á álagsprófunum á írsku bönkunum eftir lokun markaða á morgun. Þar með væru írsk stjórnvöld komin með ráðandi hlut í öllum innlendum bönkum Írlands.

Fjallað er um málið á Bloomberg fréttaveitunni.  Þar segir að álagsprófið muni skera úr um hvort fyrrgreindir tveir bankar lendi í sömu örlögum og fjórir aðrir af stærstu bönkum landsins.

Samkvæmt áliti tíu greinenda sem Bloomberg leitaði til eru allar líkur á að írsk stjórnvöld muni krefjast þess að bankar landsins útvegi sér 27,5 milljarða evra, eða tæplega 4,500 milljarða kr., í auknu eiginfé. Stjórnvöld hafa lofað bönkunum að leggja þeim til eiginfé ef þeir geta ekki aflað þess sjálfir.

Niall O´Connor greinandi hjá Credit Susisse telur að írsk stjórnvöld neyðist til þess að yfirtaka 60% af Bank of Ireland, stærsta banka landsins. Fyrir álagsprófið sem birt verður á morgun höfðu eftirlitsaðilar gert þá kröfu að Bank of Ireland útvegaði sér 1,4 milljarð evra í nýju eiginfé. Þetta er nokkuð meira en nemur núverandi markaðsvirði bankans sem er 1,3 milljarður evra.