Snorri Steinn með sex mörk í tíu marka sigri AG

AG Kaupmannahöfn vann tíu marka útisigur á HC Midtjylland, 37-27. í næst síðustu umferð deildarkeppni dönsku úrvalsdeildarinnar í dag.

AG er fyrir löngu búið að tryggja sér deildarmeistaratitilinn enda með 14 stiga forskot á AaB Håndbold þegar aðeins einn leikur er eftir fyrir úrslitakeppni.

Snorri Steinn Guðjónsson átti góðan leik með AG-liðinu en hann skoraði sex mörk og var annar markahæsti leikmaður liðsins á eftir Jakob Green sem skoraði sjö mörk. Arnór Atlason lék ekki með AG vegna meiðsla. AG var 19-11 yfir í hálfleik.

Mörk AG í leiknum: Jakob Green 7, Niclas Ekberg og Snorri Steinn Guðjónsson 6, Christian Malmagro 5, Stefan Hundstrup 4, Mikkel Hansen og Jakob Bagersted 3, Rene Toft Hansen 2, Lars Jørgensen 1.