Strákarnir áttu aldrei séns gegn Frökkum

Ísland tapaði fyrir Frakklandi í lokaumferð milliriðlakeppninnar á HM í handbolta sem lauk þar með, 34-28.

Ísland var þó öruggt með þriðja sæti milliriðils 1 fyrir leikinn og spilar á föstudaginn við Króatíu um 5.-6. sætið á HM í Svíþjóð. Ísland hefur náð best fimmta sæti á heimsmeistaramóti og getur þar með jafnað þann árangur.

Ísland tapaði þar með öllum leikjum sínum í milliriðlakeppninni - fyrir Þýskalandi, Spáni og Frakklandi.

Frakkar urðu í efsta sæti riðilsins og mæta Svíum í undanúrslitum á föstudagskvöldið. Í hinni undanúrslitaviðureiginni eigast við Danir og Spánverjar.

Þrátt fyrir tapið náðu strákarnir að spila sinn besta leik í milliriðlakeppninni. Þeir gáfust aldrei upp en mættu einfaldlega ofjörlum sínum í kvöld. Frakkar voru bara betri.

Eftir fína byrjun þar sem Ísland komst í 3-1 skoruðu Frakkar sex mörk í röð og litu aldrei um öxl. Staðan í hálfleik var 16-13.

Heimsmeistararnir stungu þá Ísland aldrei af í seinni hálfleik eins og þeir hafa gert gegn svo mörgum öðrum liðum. Strákarnir börðust til síðasta blóðdropa en voru stundum óheppnir. Skot höfnuðu í stönginni og vafasamir dómar féllu Frökkum í hag.

Björgvin Páll átti fína spretti í markinu en datt þó niður í seinni hálfleik. Ingimundur Ingimundarson var fjarverandi vegna meiðsla en Vignir Svavarsson stóð vaktina í hans fjarveru og var einn besti leikmaður Íslands í leiknum. Hann skoraði einnig þrjú mörk.

Sem fyrr var Alexander Petersson allt í öllu í sóknarleiknum. Hann átti enn einn stórleikinn og miðað við frammistöðu hans í Svíþjóð hlýtur hann að koma til greina í úrvalslið mótsins.

Þó sýndu fleiri góða spretti. Aron var óheppinn með skotin sín en gafst aldrei upp. Róbert Gunnarsson var mjög öflugur á línunni og gaf ekkert eftir í slagnum við Didier Dinart og félaga.

Guðjón, Snorri, Þórir, Ásgeir og Arnór sýndu inn á milli hversu vel þeir geta spilað en of sjaldan.

En þrátt fyrir þrjá tapleiki verður alls ekki tekið af strákanum að það er frábær árangur að spila um 5.-6. sæti á heimsmeistaramóti. En flestir, ekki síst þeir sjálfur, höfðu meiri væntingar til liðsins.

Leiknum var lýst beint á Boltavaktinni: Ísland - Frakkland.

Ísland - Frakkland 28-34 (13-16)

Mörk Íslands (skot): Alexander Petersson 6 (13), Róbert Gunnarsson 5 (7), Vignir Svavarsson 3 (4), Aron Pálmarsson 3 (11), Guðjón Valur Sigurðsson 3 (5), Þórir Ólafsson 3 /1 (6/1), Snorri Steinn Guðjónsson 2/1 (3/2), Ásgeir Örn Hallgrímsson 1 (1), Arnór Atlason 1 (3), Sigurbergur Sveinsson 1 (1), Oddur Gretarsson 0 (2)

Varin skot: Björgvin Páll Gústavsson 12 (40/2, 30%), Hreiðar Levy Guðmundsson 1 (7, 14%).

Hraðaupphlaupsmörk: 7 (Þórir 2, Vignir 2, Ásgeir örn, Guðjón Valur, Alexander)

Fiskuð víti: 3 (Vignir, Alexander, Róbert).

Brottvísanir: 10 mínútur (Sverre rautt)

Mörk Frakklands (Skot): Nikola Karabatić 7 (10), Xavier Barachet 6 (7), William Accambray 4 (5), Jérôme Fernandez 4 (6), Luc Abalo 3(4), Bertrand Gille 3 (5), Michaël Guigou 3/2 (5/2), Samuel Honrubia 2 (3), Cédric Sorhaindo 2 (4).

Varin skot: Daouda Karaboué 14/1 (29/3, 48%), Thierry Omeyer 7 (13, 54%).

Hraðaupphlaupsmörk: 5 ( Fernandez, Gille, Honrubia, Abalo, Guigou)

Fiskuð víti: 2 (Guillaume Joli, Sorhaindo).

Brottvísanir: 6 mínútur.