Segir verðbólgulækkun því miður vera gálgafrest

Þetta kemur fram í Markaðspunktum greiningar Arion banka þar sem fjallað er um nýjustu verðbólgumælingu Hagstofunnar.

Fram kemur í Markaðspunktunum að útsöluáhrif sem lækkuðu verðlag um u.þ.b. 1% eru auðvitað bara tímabundin og 0,2% lækkun á flugfargjöldum er það sennilega einnig. Ennfremur virðist yfirvofandi 0,5% hækkun verðlags vegna vsk-hækkana og 0,15% hækkun vegna tryggingagjalds ekki ætla að skila sér strax út í verðlag.

„Þá er hækkunarþörf enn til staðar hjá sveitarfélögum og orkufyrirtækjum þó svo hún hafi að einhverju leyti komið fram í janúarmælingunni. Þeir sem vilja horfa á neikvæðu hliðarnar geta því talað sig upp í 2% yfirvofandi hækkun þegar allt ofangreint er talið. Verðbólguspá okkar gerir ráð fyrir þessum hækkunum, enda teljum við að þær skili sér á endanum út í verðlagið," segir í Markaðspunktunum en fyrrgreind spá greiningarinnar gerir ráð fyrir tæplega 10% verðbólgu á fyrstu þremur mánuðum ársins.

Síðan segir í Markaðspunktunum að óvæntar tölur um verðhjöðnun hafa aukið bjartsýni markaðsaðila að verðbólgan nái „raunverulega" að ganga hraðar niður en menn höfðu almennt trú á, ef marka má viðbrögð á skuldabréfamarkaði. Talsverð eftirspurn hefur þannig verið eftir ríkisbréfum það sem af er degi á kostnað íbúðabréfa.