Hrottar ákærðir fyrir ofbeldisfull brot

Þrír rúmlega tvítugir menn hafa verið ákærðir fyrir líkamsárásir, hótanir, tilraun til fjárkúgunar og vopnalagabrot. Tveimur mannanna er gefið að sök að hafa veist að tveimur lögreglumönnum í ágúst á síðasta ári, kýlt annan í andlitið og hinn í síðuna. Þá hótuðu mennirnir að lífláta sex lögreglumenn og fjölskyldur þeirra.

Tveir þeirra, Axel Karl Gíslason og Viktor Már Axelsson, eru líka ákærðir fyrir að hafa veist að manni í Reykjanesbæ í maí síðastliðnum, þar sem hann var að setja kornabarn inn í bíl. Annar ógnaði honum með hnífi og báðir kýldu hann og spörkuðu ítrekað í hann.

Þá réðust þeir á dóttur mannsins, kýldu hana í andlit og spörkuðu í hana og spörkuðu einnig í eiginkonu hans sem reyndi að verja hann árásum.

Hótuðu þeir svo manninum hnífstungum og að lokum lífláti ef hann greiddi ekki ætlaða skuld barnabarns síns.

Annar árásarmannanna hringdi í barnabarnið og sagði því að greiða 60 þúsund krónur innan tuttugu mínútna ella hefðu aðstandendur þess verra af. Krefjast fórnarlömb árásarmannanna samtals tæplega tveggja milljóna króna í skaðabætur.

Axel er einnig ákærður, ásamt öðrum manni, fyrir innbrot í verslun í Grindavík. Höfðu þeir sett skartgripi í plastpoka fyrir tæplega 400 þúsund krónur þegar lögreglan handtók þá við innbrotið.

Þeir Axel og Viktor hlutu báðir dóma í tengslum við innbrot og ofbeldisfullt rán í heimahúsi á Seltjarnarnesi. Sá dómur féll fyrir um það bil ári.- jss