Vinnumarkaðurinn í Danmörku að botnfrjósa

Vinnumarkaðurinn í Danmörku er að botnfrjósa og fá æ færri atvinnulausir vinnu í landinu þessa dagana.

Samkvæmt fréttum af málinu í dönskum fjölmiðlum í morgun benda nýjar tölur frá verkalýðssamtökum landsins til þess að ástandið komi langverst niður á þeim sem verið hafa atvinnulausir til lengri tíma það er lengur en eitt ár.

Fyrir tveimur árum síðan fengu um 42% af þessu fólki atvinnu að nýju en nú er þetta hlutfall komið undir 30%. Fjöldi þeirra sem hefur verið atvinnulaus til lengri tíma í Danmörku hefur þrefaldast frá árinu 2008 og telur nú tæplega 55.000 manns. Atvinnuleysi í heild heldur einnig áfram að aukast.

Í Jyllands Posten er rætt við prófessor Flemming Ipsen við háskólann í Álaborg sem segir að þessar upplýsignar sýni að Danmörk er enn á botni kreppunnar.

Inger Stöjberg atvinnumálaráðherra landsins segir að baráttan við langtímaatvinnuleysi sé forgangsmál en nýlega veitti ráðuneyti hennar hálfum milljarði danskra króna, eða um 10 milljörðum kr., til aukinnar menntunnar þeirra sem verið hafa atvinnulausir í lengri tíma.