Sjálfstæðisflokkur og frjálslyndir skiluðu ekki ársreikningum

Sjálfstæðisflokkurinn og Frjálslyndi flokkurinn hafa ekki skilað Ríkisendurskoðun reikningum fyrir árið 2008 þrátt fyrir að þeim beri skylda til þess samkvæmt lögum. Ríkisendurskoðun birti í dag útdrátt úr reikningum Samfylkingarinnar, VG, Íslandshreyfingarinnar og Framsóknarflokksins. Þar koma meðal annars fram upplýsingar um fjárframlög til þeirra frá lögaðilum.

Samkvæmt lögum um fjármál stjórnmálasamtaka og frambjóðenda og um upplýsingaskyldu þeirra, sem sett voru árið 2006, skulu stjórnmálasamtök árlega skila Ríkisendurskoðun reikningum sínum sem í kjölfarið skal birta útdrátt úr þeim. Þar eiga að koma koma fram upplýsingar um heildartekjur og gjöld, uppruna tekna og helstu stærðir í efnahagsreikningi. Þá skal greina sérstaklega frá afsláttum sem samtök hafa fengið frá markaðsverði vöru eða þjónustu. Enn fremur skal birta nöfn allra lögaðila sem veitt hafa framlög til starfseminnar, eftir því sem fram kemur í fréttatilkynningu frá Ríkisendurskoðun.