Ríkisstjórnarflokkarnir högnuðust um 69 milljónir 2008

Þetta kemur fram í útdrætti á reikningum stjórnmálaflokkanna sem Ríkisendurskoðun hefur birt. Hjá báðum þessum flokkum varð mikill viðsnúningur á rekstrinum frá árinu áður eða 2007. Það ár nam samanlagt tap þessara flokka 126 milljónum kr. Þar af nam tap Samfylkingarinnar tæpum 90 milljónum kr og tap Vinstri grænna rúmum 36 milljónum kr.

Nokkur munur er á eignastöðu þessara tveggja flokka. Þannig eru eignir Samfylkingarinnar 98,6 milljónir kr. árið 2008 samkvæmt yfirliti Ríkisendurskoðunnar. Eignir Vinstri grænna eru hinsvegar tæpar 60 milljónir kr. Þessi eignastaða hjá báðum flokkunum breyttist lítið milli áranna 2007 og 2008.

Eins og áður hefur komið fram eru framlög ríkisins langhæstu tekjupóstarnir hjá báðum flokkunum. Hjá Samfylkingunni námu þau tæpum 115 milljónum kr. árið 2008 en hjá Vinstri grænum námu þau tæpum 66 milljónum kr.

Framlög lögaðila og einstaklinga námu rúmum 27 milljónum kr. hjá Samfylkingunni árið 2008. Athygli vekur að hjá Vinstri grænum var ekki um að ræða nein framlög lögaðila til reksturs flokksins á árinu 2008. Einstaklingar lögðu hinsvegar flokknum til rúmlega 18,7 milljónir kr.

Rekstur Samfylkingarinnar kostaði tæpar 89 milljónir kr. árið 2008 sem er mikil lækkun frá árinu 2007 þegar reksturinn kostaði tæplega 268 milljónir kr.

Rekstur Vinstri grænna árið 2008 kostaði rúmlega 43 milljónir kr. og lækkaði einnig verulega frá árinu 2007 þegar hann kostaði tæpar 103 milljónir kr.