Patrekur óskaði eftir aðstoð á Facebook

Patrekur Jóhannesson segir að koma Sigfúsar Sigurðssonar til Emsdetten megi rekja til færslu sem hann setti inn á Facebook-síðuna sína.

„Ég setti nú meira í gríni færslu inn á Facebook þar sem ég spurði hvort að einhver gæti hjálpað mér þar sem ég væri búinn að missa bæði línumann og varnarmann," er haft eftir Patreki í þýskum fjölmiðlum.

Nú hefur það verið tilkynnt að Sigfús Sigurðsson, línu- og varnarmaður, muni ganga til liðs við félagið.

„Hann er með algjöra handboltadellu. Ég hef þekkt hann árum saman enda góður vinur - og gríðarlega mikil styrking fyrir okkur," segir Patrekur enn fremur.

„Hann lofaði mér því að hann væri í góðu formi en hann er ekki að koma hingað peninganna vegna. Hann vill einfaldlega hjálpa okkur."

Sigfús mun fyrst um sinn spila í sex vikur með Emsdetten.