Umfjöllun: Strákarnir lögðu Letta í lélegum leik

Ísland er á toppi síns riðils í undankeppni EM í handbolta eftir fyrstu umferð. Ísland lagði Lettland, 28-26, í Laugardalshöllinni í kvöld í mjög slökum leik. Íslenska liðið var í miklu basli allan leikinn og hristi Lettana ekki af sér fyrr en rétt í lokin. Frammistaða liðsins olli miklum vonbrigðum því hún var léleg.

Þar sem Þýskaland og Austurríki gerðu jafntefli í sínum leik er Ísland eitt á toppnum með tvö stig eftir leiki dagsins.

Það var ljóst í upphafi að Ísland var að vanmeta Lettana. Strákarnir spiluðu aðeins á hálfum hraða, nenntu ekki að hlaupa til baka og það var algjörlega verðskuldað að Lettar komust 1-5 yfir.

Strákarnir tóku aðeins við sér, minnkuðu forskotið og leiddu með einu marki í leikhléi, 14-13. Aðeins eins marks munur þó svo Lettarnir hefðu verið af velli í 10 mínútur í fyrri hálfleik á meðan Ísland þurfti aldrei að fara í kælingu.

Liðin héldust í hendur allan síðari hálfleik og það gekk ekkert hjá íslenska liðinu að hrista Lettana af sér. Það skrifast fyrst og fremst á lélegan varnarleik og slök skot í sókninni.

Reyndar hjálpuðu svissnesku dómararnir lítið til. Þeir dæmdu með Íslandi í fyrri hálfleik en snérust svo allan hringinn í þeim síðari er þeir dæmdu algjörlega með gestunum.

Á lokamínútunum steig íslenska liðið upp og náði að landa naumum sigri þrátt fyrir lélegan leik.

Margir lykilleikmenn íslenska liðsins voru fjarri sínu besta í kvöld og hreinlega lélegir. Hreiðar var aftur á móti góður í markinu. Róbert magnaður í sókninni, Logi góður í vörn sem sókn og Ásgeir átti mjög flotta innkomu í síðari hálfleikinn er hann skoraði mikilvæg mörk.

Það er ljóst að svona frammistaða dugar ekki gegn Austurríki um helgina og strákarnir verða að girða sig hraustlega í brók fyrir þann leik. Leikurinn í kvöld var lélegur og strákarnir geta miklu betur, það vita þeir best allra.

Þegar upp er staðið eru það samt stigin tvö sem telja og sem betur fer enduðu þau bæði hjá Íslandi.

Ísland-Lettland 28-26 (14-13)

Mörk Íslands (skot): Ólafur Stefánsson 6/4 (11/5), Róbert Gunnarsson 5 (5), Logi Geirsson 5 (6), Ásgeir Örn Hallgrímsson 5 (6), Þórir Ólafsson 3 (3), Arnór Atlason 2 (7), Sigurbergur Sveinsson 1 (1), Snorri Steinn Guðjónsson 1 (4/1).

Varin skot: Hreiðar Levý Guðmundsson 16/1 (33/2) 48%.

Hraðaupphlaup: 3 (Þórir, Róbert, Ásgeir).

Fiskuð víti: 6 (Róbert 6).

Utan vallar: 8 mín.

Mörk Lettlands (skot): Edgars Vadzitis 6 (7), Aivis Jurdz 6 (12), Girts Lilienfelds 5/1 (5/1), Andrejs Kuzmins 2 (3/1), Margots Valkovskis 2 (4), Ingars Dude 2 (2), Valdis Gutmanis 1 (3).

Varin skot: Helmuts Tihanovs 12/1 (39/5) 31%.

Hraðaupphlaup: 4.

Fiskuð víti: 2.

Utan vallar: 14 mín.

Dómarar: Marco Meyer og André Buache. Furðulegt dómarapar. Já, og lélegt.