Skiptakostnaður Baugs orðinn um áttatíu milljónir

Skiptakostnaður vegna þrotabús Baugs Group stefnir nú hraðbyri á hundrað milljónir króna, en gæti orðið á þriðja hundrað milljónir ef búskiptin taka þrjú ár eða lengur eins og allt bendir til.

Erlendur Gíslason, lögmaður hjá Logos, var skipaður skiptastjóri þrotabús Baugs þegar fyrirtækið var lýst gjaldþrota hinn 13. mars á síðasta ári. Eftir háværa umfjöllun um hæfi Logos til að stýra þrotabúinu var Anna Kristín Traustasdóttir, löggiltur endurskoðandi, skipuð við hlið Erlends. Erlendur segir að skiptakostnaður þrotabúsins standi nú í áttatíu milljónum króna. Kostnaður vegna skiptanna hefur því verið á sjöttu milljón króna á mánuði frá gjaldþroti en stærstur hluti upphæðarinnar hefur farið til Logos.

Óhætt er að fullyrða að gjaldþrot Baugs sé eitt stærsta gjaldþrot íslensks fyrirtækis í sögunni, en kröfur í þrotabúið nema rúmlega 319 milljörðum króna. Búist er við að skiptin taki nokkur ár en ef menn gefa sér að þau taki þrjú ár, er ljóst að ef kostnaður helst svipaður munu búskiptin koma til með að kosta á þriðja hundrað milljónir króna. Skiptakostnaður telst til algjörra forgangskrafna og því greiða skiptastjórarnir sér laun áður en þeir greiða öðrum.

Anna Kristín sagði í samtali við fréttastofu í dag að í raun og veru væru allar eignir þrotabúsins til sölu. Það er samt ekki mjög mikið til umráða því nær allar verðmætustu eignir Baugs eru veðsettar. Þrotabúið hefur engin yfirráð yfir Iceland Foods verslanakeðjunni í Bretlandi þar sem hún er að fullu veðsett, en um var að ræða eina verðmætustu eign Baugs. Eignarhlutur þrotabúsins í breska tískuhúsinu Matthew Williamson er óveðsettur og vonast þrotabúið til að fá eina til tvær milljónir punda fyrir hlut sinn í fyrirtækinu, að sögn Erlends Gíslasonar.

Skiptastjórarnir biðu nú eftir niðurstöðu úr riftunarmálum sem þrotabúið hefði höfðað fyrir dómstólum hér á landi og erlendis. Stærsta málið er vegna ráðstöfunar á 30 milljarða króna söluandvirði Haga þegar félagið var selt sumarið 2008 til eignarhaldsfélagsins 1998 ehf. sem var í eigu Jóns Ásgeirs og fjölskyldu, en kaupverð var notað til að greiða niður hluta skulda Baugs við Glitni og Kaupþing auk þess sem Baugur keypti hlutabréf í sjálfum sér af eignarhaldsfélögum eigu Jóns Ásgeirs Jóhannessonar, Ingibjargar Pálmadóttur og Hreins Loftssonar. Þrotabúið hefur höfðað mál gegn Gaumi, Gaumi Holding, ISP eignarhaldsfélagi, Bague S.A sem var í eigu Hreins Loftssonar og Arion banka til að endurheimta fé.

Ekki liggur fyrir hvað fæst upp í almennar kröfur í þrotabúið en Erlendur Gíslason sagði í samtali við fréttastofu að mjög lítið myndi fást upp í þær, en sagðist ekki treysta sér að nefna prósentur í því samhengi.