Íslendingar jákvæðir í garð íslenskra fyrirtækja

Þrátt fyrir áföll í efnahagslífi landsins undanfarin misseri eru Íslendingar mjög jákvæðir í garð íslenskra fyrirtækja og traust þeirra til eigin vinnuveitanda skorar einna hæst í árlegum mælingum Capacent Gallup á trausti til stofnana og embætta.

Þetta kemur fram í nýrri könnun sem Capacent Gallup gerði fyrir Samtök atvinnulífsins. Samkvæmt könnuninni eru nærri 88 prósent landsmanna jákvæðir gagnvart sínum vinnustað og aðeins rúm 4 prósent neikvæð. Þá bera yfir 81 prósent Íslendinga mikið traust til síns vinnuveitanda en aðeins tæp 7 prósent bera til hans lítið traust.

„Niðurstöðurnar eru uppörvandi og sýna að þrátt fyrir áföll í atvinnulífinu og mjög neikvæða umræðu á köflum ber almenningur mikið traust til íslenskra fyrirtækja og er jákvætt í garð atvinnurekstrar," segir í tilkynningu frá SA.

„Ímynd atvinnulífsins er því fjarri því að vera eins sködduð og talið hefur verið og eru fyrirtækin sá hluti innviða landsins sem fólk treystir í uppbyggingarstarfinu framundan. Á þessum grunni er mikilvægt að byggja við endurreisn atvinnulífsins," segir einnig.

Hér má kynna sér niðurstöður könnunar SA.