Bréf til borgarbúa

Þann 29. maí sl. gengu Reykvíkingar eins og aðrir landsmenn til kosninga. Vegna þess óróa sem ríkt hefur undanfarin misseri tók stór hluti borgarbúa þá ákvörðun að kjósa flokk fólks sem skartaði frægum grínistum og tónlistarfólki framar öðru. Flokkurinn lagði fram mjög óskýra stefnuskrá og var málflutningur þeirra nánast óskiljanlegur á köflum. Í leiðinni gerðu þeir grín að stjórnmálamönnum sem er vel skiljanlegt, þar sem þeir hafa margir hverjir brugðist landsmönnum harkalega.

Fólkið í borginni leit á þetta sem einhverskonar byltingu þó svo að það vissi í rauninni ekki í hverju byltingin fælist. En hvað um það, þessi flokkur náði inn sex mönnum og fróðlegt verður að sjá hvernig þeim tekst að takast á við stóran vanda borgarbúa. Ég hinsvegar leit svo á að betra væri að koma á réttlæti og heiðarleika innan borgarinnar og bauð mig því fram með H-listanum með Ólaf F. Magnússon í broddi fylkingar.

H- listinn lagði fram skýra og góða stefnuskrá að mér fannst og auglýsti stefnuskrá sína vel. Auk þess að stefnuskráin væri skýr, þá var á ferð maður sem býr yfir mikilli reynslu í borgarmálum og alltaf hefur hann fylgt sannfæringu sinni. En mikill er máttur fjölmiðla. Þeim hefur með einhliða og ábyrgðarlausum fréttaflutningi í gegnum tíðina tekist að sannfæra fólk um að hér væri á ferð snargeðveikur maður; réttast væri að þagga niður í honum og það sem allra allra fyrst.

Niðurstaða kosninga varð sú að Ólafi var úthýst úr stjórn borgarinnar og finnst mér það sorglegt. Ég er stolt af sjálfri mér fyrir það að hafa boðið mig fram með hugsjónir mínar, en stoltust er ég þó yfir að hafa boðið mig fram með manni sem hefur verið ataður sora og ítrekað borinn fáránlegum sökum og niðurlægður af „samstarfsfólki" sínu í borgarstjórn.

Fyrir hönd H-listans þakka ég þeim sem þorðu að styðja okkur og fyrirgef þeim sem ekki þorðu, ég veit fyrir víst að það voru margir.