Dómnefndin víki

Baldur Arnarson skrifar um Íslensku blaðamannaverðlaunin

Um síðustu helgi var tilkynnt um tilnefningar til blaðamannaverðlauna. Margir áttu von á því að Morgunblaðið yrði tilnefnt fyrir umfjöllun um Evrópumál. Svo varð ekki. Sú ákvörðun er hvorki fagleg né til vitnis um góð vinnubrögð.

Færi ég nú fyrir því rök.

Greinarflokkurinn er sá umfangsmesti sem nokkurt íslenskt dagblað hefur ráðist í fyrr og síðar. Þegar upp var staðið fyllti hann 46 síður, heilar 23 opnur. Viðtökurnar voru afar góðar og var efnið notað til kennslu í skólum. Um tíma stóð til að gefa það út sem bók, hugmynd sem horfið var frá vegna ytri aðstæðna.

Leitað var andstæðra sjónarmiða við vinnslu greinanna og má nefna að Heimssýn, hreyfing sjálfstæðissinna í Evrópumálum, var höfð með í ráðum þegar leitað var að viðmælendum í Finnlandi. Þrír blaðamenn komu að verkinu, Pétur Blöndal, Rúnar Pálmason og undirritaður. Að auki sá Kristinn Garðarsson um uppsetningu vefhluta greinarflokksins, auk þess sem Elín Esther Magnúsdóttir vann mjög vandaða grafík fyrir hann. Pétur og Rúnar fóru til Brussel en undirritaður til Helsinki og síðar Kaupmannahafnar vegna umfjöllunar um evruna.

Greinarflokkurinn braut blað í íslenskri blaðamennsku. Sérstakt vefsvæði var stofnað innan fréttavefs Morgunblaðsins þar sem boðið var upp á texta og viðtöl sem tekin voru upp erlendis. Enginn íslenskur fjölmiðill hefur boðið upp á jafn yfirgripsmikla umfjöllun um Evrópumál.

Undirritaður leyfir sér að telja afurð þessa hóps, sem Ólafur Þ. Stephensen, þáverandi ritstjóri Morgunblaðsins, setti saman um miðjan desember 2008, einhverja þá vönduðustu í sögu blaðsins og þar með í sögu íslenskra fjölmiðla.

Vandséð er hvers vegna þessi mikli greinarflokkur var ekki álitinn eiga skilið tilnefningu í flokknum Besta umfjöllun ársins. Það er satt að segja óskiljanlegt.

Ákvörðun dómnefndar Blaðamannafélags Íslands skilur fyrst og fremst eftir undrun í huga undirritaðs. Svar við fyrirspurn til Birgis Guðmundssonar, formanns dómnefndar, um ástæður valsins bættu lítið úr skák. Birgir gat ekki útskýrt valið með faglegum rökum eins og honum ætti að vera í lófa lagið. Tekið skal fram að um trúnaðarsamskipti var að ræða og verður því ekki frekar vísað til þeirra hér eða síðar.

Framkoma dómnefndar er gróf móðgun sem ekki verður komist hjá því að mótmæla. Kemur undirritaður því á framfæri að hann segi sig úr Blaðamannafélagi Íslands. Dómnefndin starfar ekki faglega og ber því að víkja. Ákvörðunin er hneyksli og Blaðamannafélagi Íslands til háborinnar skammar.

Höfundur er blaðamaður á Morgunblaðinu. Undirritaður tekur fram að hópfélagarnir voru ekki hafðir með í ráðum við ritun þessarar greinar.