Helena og félagar í TCU skelltu toppliðinu

Helena Sverrisdóttir átti góðan leik þegar TCU vann 80-63 sigur á San Diego State í Mountain West deildinni í bandaríska háskólakörfuboltanum í nótt. Helena var með 22 stig, 7 fráköst og 4 stoðsendingar í leiknum.

San Diego State var á toppi deildarinnar fyrir leikinn en TCU hafði tapað sínum fyrsta leik í langan tíma í leiknum á undan. TCU hefur nú unnið 13 af 17 leikjum tímabilsins og er komið upp að hlið San Diego State á toppi Mountain West deildarinnar.

Helena var bæði stigahæst og stoðsendingahæst hjá TCU-liðinu en hún hitti úr 8 af 9 vítum sínum og 2 af 4 þriggja stiga skotum hennar rötuðu rétta leið. Þetta var sjötti leikurinn á tímabilinu (af 17) þar sem hún er stigahæst hjá TCU.