Sigfús Sigurðsson í Emsdetten

Sigfús Sigurðsson hefur ákveðið að ganga til liðs við þýska B-deildarliðið Emsdetten sem Patrekur Jóhannesson þjálfar og mun spila með liðinu næstu sex vikurnar að minnsta kosti.

Fréttirnar koma nokkuð á óvart þar sem að Sigfús hefur verið lengi frá vegna meiðsla.

„Þetta kom þannig til að Patta, vini mínum, vantaði mann og hann setti sig í samband við mig," sagði Sigfús við Vísi. „Einn af varnarmönnunum hans fékk botnlangakast og annar er puttabrotinn. Ég er því að fara út fyrst og fremst til að hjálpa honum."

Hann segir að líkamleg heilsa hans sé ágæt. „Leikæfingin er ekki mikil en líkamlega standið er betra en oft áður hefur verið."

„Ég fór í stóra aðgerð fyrir einu og hálfu ári síðan en fór aðeins of fljótt af stað með Val á síðasta tímabili. Ég saup svo seyðið af því síðar."

„Í sumar var ég mikið að synda og hreyfa mig og er orðinn léttari en áður. Löppin er öll að koma til og get spilað með aðstoð spelku."

Hann fagnar því að geta komið Patreki til aðstoðar. „Þegar ég byrjaði að spila aftur með landsliðinu árið 2001 þá var hann einn af þeim sem hjálpaði mér sem mest. Vonandi fæ ég núna tækifæri til að hjálpa honum á móti."

„Hann er frábær þjálfari og góður vinur."

Sigfús segist einnig reiðubúinn að hjálpa íslenska landsliðinu verði þess óskað. „Það er ekki mitt að ákveða það en ef þjálfarinn myndi vilja nota mig og þiggja mína hjálp er ég alltaf boðinn og búinn til þess."

Sigfús heldur utan á morgun og spilar með Emsdetten gegn Gylfa Gylfasyni og félögum í Minden á laugardaginn.