Allur flugfloti Icelandair stoppar í dag vegna verkfallsins

Verkfall flugvirkja hjá Icelandair hófst klukkan eitt í nótt eftir að viðræður þeirra við félagið sigldu í strand hjá Ríkissáttasemjara í gærkvöldi. Vélar félagsins frá Evrópu voru að tínast til Keflavíkur í nótt, en brottför þeirra seinkaði í gærmorgun vegna eldgossins.

Þá komu þrjá vélar frá Boston til Kelfavíkur í nótt eftir sólarhrings töf, sú síðasta á sjöunda tímanum þar sem hún tafðist í Boston eftir að farartæki á vellinum ók utan í hana. Þrjár vélar til viðbótar koma svo að vestan í morgunsárið, sú síðasta er væntanleg klukkan tíu.

Þá verður allur flugvélafloti Icelandair á Keflavíkurflugvelli og kemst hvergi fyrr en verkfallinu lýkur. Það er ótímabundið þannig að samninga þarf til, en ríkisáttasemjari hefur ekki boðað nyjan fund enn sem komið er.

Eins og fram hefur komið fylgjast stjórnvöld með framvindu málsins og óformlega hefur verið rætt um setningu bráðabirgðalaga, líkt og til stóð vegna verkfallsaðgerða flugumferðarstjóra, en ekkert liggur fyrir um það á þessari stundu.

Flug Iceland Express verður hinsvegar með eðlilegum hætti þrátt fyrir verkfallið.

Ferðum Icelandair til eftirfarandi áfangastaða hefur verið frestað og er fólk hvatt til þess að fylgjast með á textavarpi. Nýjar upplýsingar munu berast klukkan níu.

FI318 Osló

FI306 Stokkhólmur

FI542 París

FI204 Kaupmannahöfn

FI436 Manchester/Glasgow

FI450 London