Kynjuð úttekt

Ég hélt að ég væri búinn að heyra allt hugsanlegt og óhugsanlegt bull sem ráðamenn einnar þjóðar geta á annað borð látið út úr sér. Þá er ég að miða við tímabilið frá því nokkrum mánuðum fyrir hrunið 2008 og fram til dagsins í dag.

En lengi er von á einum. Nú vill Atli Gíslason þingmaður Vinstri grænna að ríkissjóður eyði einhverjum milljónum króna mitt í blóðugum niðurskurðinum í kynjaða úttekt á skýrslu rannsóknarnefndar Alþingis.

Jedúddamía eins og einn uppáhalds bloggarinn minn myndi segja. Þetta er einmitt sú úttekt sem þjóðinni er nauðsynleg í dag. Þessi úttekt mun létta þjáningar okkar og lina kreppuna. Það er bara smotterí að hún mun kosta starf eins og eins ríkisstarfsmanns í niðurskurðinum.

Fyrir þá sem ekki vita hvað kynjuð úttekt er var nokkrum tíma eytt í að útskýra málið fyrir þjóðinni í sjónvarpsfréttunum í kvöld. Þar var rætt við sérfræðing um málið sem lýsti þeirri nauðsyn að kortleggja áhættusækni karlmanna umfram kvenna, og sitthvað fleira, eins og það kæmi fram í skýrslunni.

Undirliggjandi var nefnilega sá nakti sannleikur að þessi hegðun karlmannanna hefði í raun ekkert breyst eftir hrunið. Því þyrfti sumsé úttekt á þessu á kostnað skattgreiðenda upp á einhverjar 2-3 milljónir króna.

Ég hef síður en svo nokkuð á móti því að fólk taki sig til og geri kynjaða úttekt á skýrslu rannsóknarnefndar Alþingis. Ég tel bara að miðað við stöðu þjóðarbúsins eigi viðkomandi að gera það á eigin kostnað og gefa svo út í bók til að ná upp í kostnaðinn. Þá borgar hver sem vill fyrir úttektina en ekki þjóðfélagið í heild.

Aðrir menn hafa tekið sig til og gert úttekt á fyrrgreindri skýrslu og síðan sett á almennan markað í kiljuformi. Þetta er einfaldasta mál. Sú úttekt sem er á markaðinum í dag er að vísu ekki kynjuð svo ég viti til.

Raunar veit ég ekki að hvaða gagni svona úttekt kæmi í raun. Ég tel það augljóst að áhættusækni karlmanna og aðrir „lestir" umfram konur hafi verið til frá tímum Adams og Evu. Og verði til staðar þar til botnfrýs í helvíti. Það þarf ekki kynjaða úttekt til þess að segja fólki þann sannleik.

Res ipsa logiutur