Gosi - ævintýrið um Ísland

Ævintýrið um Gosa lýsir því einstaklega vel hvaða vandamálum fulltrúalýðveldið á Íslandi stendur nú frammi fyrir. Ísland er statt í hápunkti ævintýrisins á eins og það var skrifað í lok kreppunnar miklu.

Jakob tréskurðarmaður og skapari Gosa er íslenska þjóðin. Gosi, trébrúðan, er kjörinn fulltrúi íslensku þjóðarinnar. Tumi engispretta, sem fylgir Gosa og reynir að gefa honum ráð, er hver sá sem reynir að verða fulltrúum íslensku þjóðarinnar að gagni.

Gosa bíða margar áskoranir úti í hinum stóra heimi. Örlög hans fara eftir því hvernig hann bregst við þeim. Hann gæti orðið strengjabrúða í brúðuleikhúsi, asni eða drengur af holdi og blóði, eins og hann dreymir um. Allt fer þetta eftir því hvernig honum tekst að bregðast við þeim áskorunum sem bíða hans.

Ég ætla ekki að segja söguna um Gosa hér, hana þekkja flestir.

Í hápunkti sögunnar eru Jakob, Gosi og Tumi staddir í maga hvalsins, rétt eins og íslenska þjóðin. Ég sé fyrir mér gráhærðan mann með gleraugu, trébrúðu og lítinn grænan kall. Þarna er eldsmatur sem mætti nýta til að fá hvalinn til að hósta þeim upp og nokkur euróbretti sem þeir gætu fleytt sér á í land. Svo maður noti nokkrar myndlíkingar.

Hvort trébrúðan sýnir þá verðleika sem munu gera hana að dreng af holdi og blóði vitum við ekki enn.

Vonandi tekst þeim félögum, með samstilltu átaki, að bjarga sér út um gin hvalsins og giftusamlega í land.