NBA: Kobe klikkaði á 13 skotum í röð í tapi Lakers fyrir San Antonio

Það gengur lítið hjá meisturum Los Angeles Lakers í NBA-deildinni í körfubolta þessa daganna en liðið tapaði fyrir San Antonio Spurs í nótt. Þetta var þriðji skellur Lakers-liðsins í röð og liðið hefur ekki skorað meira en 82 stig í þeim öllum. Miami Heat, Orlando Magic, Chicago Bulls og Boston Celtics unnu öll í nótt en Dallas Mavericks tapaði óvænt á heimavelli á móti Toronto.

Tony Parker skoraði 23 stig fyrir San Antonio Spurs í þessum 97-82 heimasigri á Los Angeles Lakers og DeJuan Blair var með 17 stig og 15 fráköst. Sigur Spurs var óvenju öruggur miðað við það að þeir Tim Duncan (2 stig, 4 fráköst) og Manu Ginobili (9 stig) áttu hvorugur góðan leik.

„Það er alltaf gott að vinna meistarana," sagði Manu Ginobili eftir leikinn en það var ekki eins gott hljóð í Kobe Bryant .„Ég er bara reiður út í sjálfan mig fyrir að spila ekki betur því ég spilaði mjög illa," sagði Kobe sem skoraði 21 stig en hitti aðeins úr 8 af 27 skotum. Hann klikkaði meðal annars á 13 skotum í röð í leiknum og var með 5 tapaða bolta en aðeins eina stoðsendingu.

San Antonio Spurs er búið að vinna 27 af 31 leik á tímabilinu og eru komnir í hóp með þeim liðum sem hafa byrjað tímabilið hvað best. Síðasta lið til þess að byrja svona vel voru verðandi NBA-meistarar Boston Celtics 2007-2008 sem unnu þá 28 af 31 leik.

Dwyane Wade skoraði 40 stig fyrir Miami Heat og þeir LeBron James og Chris Bosh voru báðir með 18 stig og 10 fráköst þegar liðið vann 106-98 sigur á New York Knicks.

Zydrunas Ilgauskas var með 14 stig og 10 fráköst fyrir Miami sem hefur unnið 15 af síðustu 16 leikjum sínum. Amare Stoudemire var með 30 stig fyrir New York og Wilson Chandler skoraði 21 stig. Miami náði mest 22 stiga forystu en New York vann sig inn í leikinn í lokin.

Gilbert Arenas var með 22 stig og 11 stoðsendingar og Jason Richardson bætti við 20 stigum þegar Orlando Magic hélt áfram uppgangi sínum með 110-95 sigri á Cleveland Cavaliers.

Þetta var fjórði sigur Orlando í röð en liðið setti niður 19 þriggja stiga körfur í leiknum. Antawn Jamison skoraði 21 stig fyrir Clveland sem hefur tapað 14 af síðustu 15 leikjum sínum.

Chauncey Billups skoraði 18 stig þegar Denver Nuggets endaði þriggja leikja taphrinu með 95-77 sigri á Portland Trail Blazers. J.R. Smith og Nene voru báðir með 17 stig en liðið lék fjórða leikinn í röð án Carmelo Anthony sem missti systur sína á dögunum. LaMarcus Aldridge var með 18 stig og 13 fráköst hjá Portland.

Paul Pierce skoraði 21 stig og Ray Allen bætti við 17 stigum þegar Boston Celtics vann 95-83 útisigur á Indiana Pacers. Boston hefur unnið 4 af 5 leikjum síðan þeir misstu Rajon Rondo í meiðsli en eina tapið í sextán síðustu leikjum kom á móti Orlando Magic í leiknum á undan. Brandon Rush skoraði mest fyrir Indiana eða 17 stig.

Carlos Boozer og Luol Deng skoruðu báðir 24 stig þegar Chicago Bulls vann 90-77 heimasigur á Milwaukee Bucks. Derrick Rose var með 18 stig, 12 stoðsendingar og 6 fráköst í þessum ellefta sigri Chicago í síðustu þrettán leikjum. John Salmons skoraði 18 stig fyrir Bucks-liðið.

Nýliðinn Ed Davis var með 17 stig og 12 fráköst þegar Toronto Raptors vann óvæntan 84-76 útisigur á Dallas Mavericks. Linas Kleiza og DeMar DeRozan skoruðu báðir 16 stig. Það vantaði marga í lið Toronto en Dallas lék án Dirk Nowitzki. Jason Terry var stigahæstur hjá Dallas með 18 stig en Mavericks-liðið hafði fyrir leikinn unnið 17 af síðustu 18 leikjum sínum.

Öll úrslit í NBA-deildinni í nótt:

Cleveland Cavaliers-Orlando Magic 95-110

Indiana Pacers-Boston Celtics 83-95

Miami Heat-New York Knicks 106-98

Chicago Bulls-Milwaukee Bucks 90-77

Dallas Mavericks-Toronto Raptors 76-84

San Antonio Spurs-Los Angeles Lakers 97-82

Denver Nuggets-Portland Trail Blazers 95-77